រាជធានីភ្នំពេញ ៖ សេចក្តីរាយការណ៍ឱ្យដឹងថា នារសៀលថ្ងៃទី១៧ មិថុនា នេះ មានការចុះបង្ក្រាបបទល្មើសនាំចូលឱសថពីប្រទេសថៃ ដោយគ្មានច្បាប់អនុញ្ញាត្តពីក្រសួងសុខាភិបាល ដែលមានចំនួន៥មុខ ស្ថិតនៅឃ្លាំងមួយកន្លែងលេខ៩៩ លើផ្លូវលេខ៣៥៨ ក្នុង សង្កាត់ទួលស្វាយព្រៃ១ ខណ្ឌចំការមន រាជធានីភ្នំពេញ ។ ក្នុងនោះ ក៏មានការអញ្ជើញពីម្ចាស់ឃ្លាំងម្នាក់ឈ្មោះសុខ សូផន ភេទប្រុស អាយុ៤២ឆ្នាំ នាំទៅនាយកដ្ឋាននគរបាលប្រឆាំងបទល្មើសសេដ្ឋកិច្ច ដើម្បធ្វើការសាកសួរ។
ការបង្ក្រាបនេះ ធ្វើឡើងដោយកម្លាំងសមត្ថកិច្ចនគរបាលនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃ និងមានការសហការជាមួយមន្ត្រីជំនាញនៃក្រសួងសុខាភិបាល ក្រោមការសម្របសម្រួលពីកាលពីលោកលី សុផាណា ព្រះរាជអជ្ញារង នៃអយ្យការអមសាលាដំបូងរាជធានីភ្នំពេញ ។ ក្នុងនោះ ក៏មានការដឹកនាំផ្ទាល់ដោយលោកឧត្តមសេនីយ៍ទោ ឡុង ស្រេង អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច ។
ឱសថទាំង៥មុខ សុទ្ធសឹងជាឱសថប្រភេទថ្នាំលេបសម្រកទម្ងន់ (មានចំនួនរាប់ម៉ឺនគ្រាប់), ថ្នាំលាបបំបាត់មុនជាច្រើនប្រអប់ និងទឹកថ្នាំលាងក្រចកជាច្រើនដបផងដែរ ។ លោកឡុង ស្រេង បន្តថា ឱសថទាំង៥មុខនេះ ត្រូវបានឈ្មួញនាំចូលមកពីប្រទេសថៃ និងបង្កប់ក្នុងគីបខោអាវជជុះ បម្រុងដឹកចេញទៅប្រទេសវៀតណាម គ្មានច្បាប់អនុញ្ញាតិ និងគ្មានការចុះបញ្ជីការនៅក្រសួងសុខាភិបាលទេ ។
ក្រោយពីពិនិត្យ និងរកឃើញថា ឱសថទាំង៥មុខនេះត្រូវឈ្មួញនាំចូល និងបម្រុងឆ្លងកាត់ប្រទេសកម្ពុជាដោយខុសច្បាប់ និងគ្មានច្បាប់អនុញ្ញាតិនោះ គណកៈម្មការបានវេចខ្ចប់នាំទៅរក្សាទុកនៅនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ។
